Petisyon Kont Militè NasyonZini ki na Peyi Dayiti

Lè nou konsidere ke  pèp Ayisyen yan pat janm te envite okenn moun, okenn peyi etranje pou yo voye solda vini pile tè Desalin ak Petyon wan pou ba l  sekirite.

Lè nou konsidere ke se pa Kayen selman ki pitit tè Dayiti. Peyi ya gen moun ki gen repondong, ki gen bon jan santiman, ki pap troke yanm pou po, ki konnen sa yon Leta ye e ki gen bon lisans lan ponyèt yo pou yo ka pran volan peyi ya mennen l, san tèt fè mal, lan bon chimen devlopman

Lè nou konsidere ke presans Fós Loni yo se yon kout ponya lan do, yo bay pèp ayisyen, se yon zak asasinay yo fè sou Peyi Dayiti ki youn lan premye manb fondatè LONI.

Lè nou konsidere dividal lajan ke MINUSTHA depanse  san pèp la pa janm wè kote jou louvri lan poch li.

Lè nou konsidere ke mago saa  MINUSTHA ap manje ya se tout Kominote Entenasyonal la ki kotize pou yo bay Pèp ayisyen yan yon la vi miyo .

Lè nou konsidere ke  pil ak pakèt lajan saa yo depanse pou MINUSTHA, li ta pi bon si nou ta itilize l pou nou kreye yon Fós Nasyonal pou Proteksyon Teritwa nou ki ta gen pou misyon pou l patisipe lan yon seri de projè nasyonal tankou rebwazman, operasyon predezas ak posdezas, fè demokrasi ya vini dyanm.

Lè nou konsidere ke  la pè se pa yon flè lasezon. Vrè pè ya se lan kè nou li dwe chita pou nou ka viv lib e libè lakay nou san  kè kase, san pèsonn pa mande nou : De ki prevyen ? De ki mannigans ?.

Nou, menm Pitit Jan Jak Desalin ak Petyon nou siyen lèt saa, pou nou mande :

a)   Tout oganizasyon entènasyonal, tout biro kap okipe zafè peyi l ak lot peyi, pit kon poro, pou yo respekte dwa pèp ayisyen genyen pou l mennen tèt li. Nou te goumen anpil pou dwa lot pèp pou yo gen souverènte yo, sitou lan Amerik la.

b)     Gouvènman ki voye solda yo lan Fos Nasyon Zini ya, tan pri souple, alsa yo pou nou. Epi koupe n sa sèk, pou tout tan.

c)   Gouvènman ameriken, Inyon Eropeyèn, Sekretè Jeneral  Nasyon Zini,  Palman Eropeyen,tout pisans ki di yo se zanmi Ayiti e ki respekte dwa pèp pou yo viv sou yon Tè endepandan, pou l fè Enstitisyon repibliken yo mache san l pa bezwen gen Solda LONI ak baton dèyè l;

d)     Kominote Entènasyonal, lajan l tap peye Solda Loni yo, tan pri souple mete l lan kès Leta Ayisyen pou yon lót 5 kan pou l kapab gen ase fós pou l pèmet enstitisyon pa nou bay sekirite, proteje pèp la e simaye demokrasi.

San pedi tan nou vle :

1-      yon almanak ki montre nou tankou dlo koye ki jou, ki dat,ki mwa, ki lane, Solda Nasyon Zini yo ap rache manyók yo bannou tè ya blanch san di pètèt ni wa di;

2-      ke yo komanse bat tanbou rasanbleman yon lót fos piblik nasyonal pou proteje tè Dayiti.;

3-     Fè restavèk LONI yo kap pase lód lan tout Biro , pou yo anfondre peyi ya pi plis,  al kanpe byen lwen.

4-     Mete sou gouvènay Peyi DayIti Pitit fi l ak Pitit gason l ki respekte manman yo ak papa yo, ki pa janm vann konsyans yo pou dola, ki renmen frè ak sè yo  e ki ta anvi ke sak bon pou yo wa,  bon pou lót yo tou.

Pótoprens jou ki te 28 septanm 2009